ತ್ಯಾಂಪ ಸೀನ

ತ್ಯಾಂಪ ಸೀನನ ಕಂಪೂಟರ್ ಕಲಿಕೆ   1

ಹದಿನಾ.......ರು ಪೇಜಿನ ರಿಪೋರ್ಟ್ ಅದು.
ಎಲ್ಲಾ ಲೆಕ್ಕಾಚಾರ ಮಾಡಿ ಸರಿಯಾಗಿ ಕ್ರಾಸ್ ಚೆಕ್ ಮಾಡಿಟ್ಟಿದ್ದೆ.
ತ್ಯಾಂಪ ಮತ್ತು ಶೀನ ಇಬ್ಬರೂ ವಕ್ಕರಿಸಿದರು... ಛೇ ಅಲ್ಲಲ್ಲಪ್ಪಾ ನನ್ನ ಆಪ್ತ ಸ್ನೇಹಿತರಲ್ಲವ್ರಾ ಇವ್ರು..?
ಬರಲೇನಾ    ಒಳಕ್ಕೇ......?
ಬಂದಿದ್ದಾಯ್ತಲ್ಲಾ... ಬನ್ರೀ ಬನ್ರೀ .. ಏನು ವಿಶೇಷ ಇಬ್ಬರೂ ಒಟ್ಟಿಗೇ..??
ನಾವು ಕಂಪ್ಯೂಟರ್ ಕಲೀತಾ ಇದ್ದೀವಿ...
ಅರ್ರೇ    ತುಂಬಾನೇ ಒಳ್ಳೆಯ ವಿಷಯ ಇದು.. ಏನೆನೆಲ್ಲಾ  ಕಲಿತ್ರಿ..??
ಸುಮಾರಾಗಿ ಎಲ್ಲಾ ಕಲೀತಾಯ್ತು,... ಇಲ್ಲಿ ನಿನ್ನ ಕಂಪ್ಯೂಟರಿನಲ್ಲಿ ತೋರಿಸಲಾ..?
ತ್ಯಾಂಪ ಆಪ್ತವಾಗಿ ಕೇಳಿದಾಗ ನನಗೆ ಬೇಡ ಎನ್ನಲಾಗುವುದಿಲ್ಲ ನನ್ನ ದೌರ್ಬಲ್ಯ ಅದು, ಅದು ಇವರಿಬ್ಬರಿಗೂ ಗೊತ್ತು, ಮತ್ತು ನನಗೂ.
ನೋಡಪ್ಪಾ ಏನಾದ್ರೂ ಮಾಡಿ, ಆದರೆ ನನ್ನ ಫೈಲ್ ಮುಟ್ಟಬೇಡಿ. ಆಯ್ತಾ.
ನಾನೊಂದು ಹೊಸ ವಿಷಯ ಹೇಳ್ತೇನೆ, ನಿಮಗೇನಾದರೂ ನಮ್ಮ ಕಂಪ್ಯೂಟರಿನಲ್ಲಿ ಬೇಕಾದರೆ ಕಂಟ್ರೋಲ್ ಪ್ಲಸ್ ಎಫ್ ಒತ್ತಿದರಾಯ್ತು. ಒಂದು ಟಾಸ್ಕ್  ಬಾರ್ ಬರ್ತದೆ
ಇಲ್ಲಪ್ಪ ನಮಗೆ ಹಗಲಲ್ಲಿ ಅಂತಹಾ ಕುಡಿಯುವ ಮೂಡೇನೂ ಇರಲ್ಲಾ
ತುಥ್!!  ಅದಲ್ಲಾ ಮರಾಯಾ ಶೀನ ನನ್ನ ನೆರವಿಗೆ ಬಂದ
ಆ ಬಾರ್ ಲ್ಲಿ ಏನು ಬರೆಯುತ್ತೀರೋ ಅದನ್ನು ನಿಮಗೆ ಕಂಪ್ಯೂಟರ್ನಲ್ಲಿ ತೋರಿಸುತ್ತದೆ
ಇಬ್ಬರ ಮುಖದಲ್ಲಿ ಆಶ್ಚರ್ಯ ಎದ್ದು ಕಾಣುತ್ತಿತ್ತು..
ಖುಷಿಯಿಂದ ವಿವರಿಸಿದೆ.  ಇದು ಮಾತ್ರ ನನ್ನ ಮನಸ್ಸು ಬೇಡವೆಂದರೂ ಕೇಳದೇ.
ಅಷ್ಟೇ ಅಲ್ಲ ಅದರಲ್ಲಿ ಇನ್ನೊಂದು ಅಯ್ಕೆ ಇದೆ ಅದರಲ್ಲೇ.
ಇದರಲ್ಲಿ ಬದಲು ಮಾಡಿ ಅಂತ ಇನ್ನೊಂದು ಇದೆ ಅದನ್ನ ಒತ್ತಿದರೆ ನೀವು ಬರೆದ ಅಥವಾ ತಪ್ಪೆನಿಸಿದ ಯಾವುದೇ ಶಬ್ದವನ್ನು ಬದಲಿಸಬಹುದು ಗೊತ್ತಾ..??
ಹೌದಾ ಮರಾಯ ಸಾವಿರ ಪೇಜಿದ್ದರೂ..???
ಹೌದು ಲಕ್ಷ ಪೇಜಿದ್ದರೂ ಕೂಡಾ
ಬೇಕಿದ್ದರೆ ನೋಡು..
ಅಷ್ಟರಲ್ಲಿ ಕಲ್ಲೂರಾಮ್ ಕರೆ ಬಂತು..
ನೋಡ್ತಾ ಇರಿ ಈಗ ಬಂದೆ ನಾನು, ಅವರಿಬ್ಬರನ್ನೂ ಬಿಟ್ಟು ನಾಹೊರಬಂದೆ
ಏನ್ರೀ ರಾವ್ ಎಲ್ಲಿದೆ ಬಡ್ಜಟ್  ರಿಪೋರ್ಟು..?
ರೆಡಿ ಇದೆ ಸಾರ್
ಮೂರ್ದಿನದಿಂದ ಇದೇ ಹೇಳ್ತಾ ಇದ್ದೀರಲ್ರೀ , ಹೆಡ್ ಆಫೀಸಿನಿಂದ ತಲೆ ತಿನ್ತಾ ಇದ್ದಾರೆ, ಎಲ್ಲಿ ಬೇಗ ತನ್ನಿ..
ಏನ್ಸಾರ್ ಒಂದ್ವಾರ ಬೇಕು ಅದನ್ನ ಪೂರ್ತಿಯಾಗಿ ಮಾಡೊಕ್ಕೆ, ಅದನ್ನ ನಾನು ದಿನಾ ರಾತ್ರೆ ಅಂತ ನಿದ್ದೆಗೆಟ್ಟು ನಾಲ್ಕ್ ದಿನ್ದಲ್ಲಿ ಮಾಡಿದ್ದೇನೆ ಅದನ್ನ , ನಂಗೇ ಜೋರ್ ಮಾಡ್ತಾ ಇದ್ದೀರಲ್ಲಾ
ಸರಿ ಸರಿ, ಕಳುಹಿಸಿ ಬೇಗ
ವಾಪಾಸ್ ಚೇಂಬರಿಗೆ ಬಂದೆ
ಇಬ್ಬರೂ ಕಂಪ್ಯೂಟರಿನೊಳಕ್ಕೇ ತಲೆ ಹಾಕ್ಕೊಂಡಿದ್ದಾರೆ.
ಅಕ್ಕಾ ನೀನ್ ಹೇಳ್ದನ್ನ ನಾವ್ ಕಲ್ತ್ಕಂಡೇ ಬಿಡ್ತ ಕಾಣ್
ಎಂತದಾ
ನೀನ್ ಹೇಳಿ ಕೊಟ್ಟಿಯಲ್ಲೆ, ಅದೇ ರಿಪ್ಲೇಸ್ , ಕಂಡ್ರೆ ನಿಂಗೂ ಖುಷೀಯಾತ್ ಕಾಣ್
ಹೌದಾ ಎಲ್ಲಿ..?
ಅದೇ ನಿನ್ನ ರಿಪೋರ್ಟ್ ಇದೆಯಲ್ಲಾ, ಹದಿನಾರು ಪೇಜಿನದ್....................!!
ಅಲ್ಲಾ ಮರಾಯಾ ಅದನ್ನ್ ಏನೂ ಮಾಡ್ಬೇಡಿ ಅಂದಿದ್ದೆನಲ್ಲಾ..??
ಎಂತದ್ದೂ ಮಾಡ್ಲ್ಯಾ  ..........ಇಲ್ ಕಾಣ್...........೬ ರ ಬದ್ಲು ಆರ್ ಅಂತ್ ಮಾಡ್ದೆ, ಏಳರ ಬದಲು ಪಿ ಮಾಡ್ದೆ  ಮೂರರ ಬದ್ಲು ಕ್ಯೂ ಅಂತ ಮಾಡ್ದೆ.
ಅಲ್ದಾ  ನೀನ್ ಮಾಡದ್ ಆರ್ ಗೆ ೮ , ಪಿ ಗೆ ೩ ಮತ್ ಕ್ಯೂ ಗೆ ೬ ಮಾಡದ್
ಅಲ್ಲಾ ನಂಗೆ ಸರೀ ನೆನ್ಪಿತ್ತಾ, ನಾನ್ ಹೇಳದ್ದೇ ಕರೆಕ್ಟ್..........

ಒಂದೇ ಕ್ಷಣ ನನ್ನ ಎದೆ ಬಡಿಯುವುದನ್ನೇ ನಿಲ್ಲಿಸಿತು........ ಅಂದರೆ
ನನ್ನ.... ರಿಪೋರ್ಟ್ ನಲ್ಲಿ ಇವರ ಕಲಿತಾಟ.....
ಸತ್ಯಾನಾಶ್,
ಅಂಕೆಗಳ ಬದಲು ಇಂಗ್ಲೀಷ್ ಅಕ್ಷರಗಳು ಅದೂ ಅದನ್ನ ಬದಲು ಮಾಡುವಾಗ ಒಂದೇ ಅಂಕೆ ತಪ್ಪಾದರೂ ಸರ್ವ ನಾಶ ಖಂಡಿತಾ, ಹೊಸದಾಗಿ ಮಾಡಲು ಸಮಯವೂ ಇಲ್ಲ..
ಪುನಃ ಬಾಸ್ ನ   ಕರೆ
ಏನೂ ಮಾಡಲು ತೋಚದೇ ದಿಗ್ಞೂಡನಾಗಿ ನಿಂತೆ.
ಅಕ್ಷರಗಳು ಅಂಕೆಗಳಾಗಿ ಅಂಕೆಗಳು ಅಕ್ಷರಗಳಾಗಿ ನನ್ನ ಅಣಕಿಸುತ್ತಿದ್ದವು.
ಅಯ್ಯೋ ನನ್ನ ಮಾವಂದಿರಾ ....ಮತ್ತೇನಾದರೂ ಮಾಡಿದ್ದೀರಾ ಇದ್ರಲ್ಲಿ..?
ಅಂದ್ರೆ ಎಂತ ನೀನ್ ಹೇಳೂದ್..?
ಅಲ್ಲ ಶ್ರೀಧರ್ ಅವರು ಹೇಳಿದ ಹಾಗೇ ಕಂಟ್ರೋಲ್ + ಎಸ್ ಅಂತೇನಾದರು ಒತ್ತಿದ್ರಾ...?
ಹೌದಲ್ಲಾ.... ನಮ್ಮ ಮಾಸ್ಟ್ರ್ ಹೇಳಿ ಕೊಟ್ಟಿದ್ದರಲ್ಲಾ...?
ಏನಂತ..? ನನ್ನ ಎದೆ ಬಡಿತ ಇನ್ನೂ ಜೋರಾಯ್ತು..!!!
ಅದ್ ಒತ್ತಿದ್ ಮೇಲೇ ನೀನ್ ಬಂದದ್ ಮರಾಯಾ...!!??!!
ಗೋವಿಂದಾ ಗೋವಿಂದ....!!!!!!!!!






ತ್ಯಾಂಪ ಸೀನನ ಕಂಪೂಟರ್ ಕಲಿಕೆ   2

ಅಯ್ಯೋ ದೇವರೇ.......
ಏನು ಮಾಡಿ ಬಿಟ್ಟಿರಿ ಅನ್ನೋ ಜ್ಞಾನ ಇದೆಯಾ ನಿಮಗೆ ನನ್ನ ಸ್ವರ ಜೋರಾಗಿತ್ತಾ...?
"ಎಂತ ಆಯಿಲ್ಲ್ಯಾ... ತ್ಯಾಂಪ ಈಗ ಸರಿ ಮಾಡ್ತ ಕಾಣ್ ಬೇಕಾದ್ರೆ..." ಇದು ಸೀನನ ಸ್ವರ.
ಬೇಡ   ಬೇಡವೇ ಬೇಡ, ನೀವಿಬ್ಬರೂ  ಮುಟ್ಟಬೇಡಿ ... ಕಂಪೂಟರ್ , ಈಗ ಮಾಡದ್ದೇ ಸಾಕ್ ಬಿಡಿ. ಅಂದೆ ಸ್ವಲ್ಪ ಬೇಸರದಲ್ಲಿ.
ಕೂಲ್ ಕೂಲ್... ಗೋಪಿ ಕೂಲ್....
ನನ್ನನ್ನ ನಾನೇ ಸಂತೈಸಿಕೊಂಡೆ, ಮನಸ್ಸು ಗಲಿಬಿಲಿಗೊಂಡಾಗ ನಾನು ಸಾಧಾರಣವಾಗಿ ಇದನ್ನೇ ಮಾಡುವುದು,
ನಾಲ್ಕಾರು ಧೀರ್ಘ ಶ್ವಾಸ ತೆಗೆದುಕೊಂಡೆ. ನಂತರ ಯೋಚಿಸ ತೊಡಗಿದೆ.
ಪಿ ಕ್ಯೂ ಆರ್ ಬದಲಿಗೆ ೬,೩,೭,೮ ಈ ನಾಲ್ಕೇ ಅಂಕೆಗಳು ಬದಲಾಗಿ ಅಕ್ಷರಗಳಾಗಿವೆ. ಅಷ್ಟೇ....ಏನಾಯ್ತೀಗ ಅದನ್ನು ಬದಲಾಯಿಸಿದರೆ ಸಾಕು...
ಅದು ಅನಿಜವಾಗಿಯೂ ಅಷ್ಟೇನಾ....?? ಕಡಿಮೆ ಪಕ್ಷ ಒಂದು ಪುಟದಲ್ಲಿ ಬದಲಾಯಿಸ ಬೇಕಾದ ಅಂಕೆಗಳು ಕೇವಲ ಐವತ್ತು ಇದ್ದರೂ ಸರಿಯಾದ ಕ್ರಮದಲ್ಲಿ ಇಡಬೇಕಾದರೆ ೧೬ * ೫೦ *೪ ಸಾರಿ .... ಅಬ್ಬಾ
ಕಲ್ಲೂರಾಮ್ ನನ್ನ ಕೊಂದು ಹಾಕಿಯಾನು..... ಅಲ್ಲ ಇವರ ಜತೆ ನನಗೂ  ಟಿಕೆಟ್ಟೇ
ಅಷ್ಟರಲ್ಲೇ ನಕ್ಷತ್ರಿಕ ಚಂದ್ರೂ ಬಂದ. ಸಾರ್ ಬಾಸ್ ಬಿಸೀಲವ್ರೆ, ( ಸಿಟ್ಟು)
ನನ್ನ ಸಂಕಟ ಕೇಳುವರ್ಯಾರು..?  
"ಅವರಿಗೆ ಒಂದು ಗ್ಲಾಸ್ ತಣ್ಣಗಿನ ನೀರು ಕೊಟ್ಟು ಬಾ"
"ಅಲ್ಲ ನೀವು ಬರಬೇಕಂತೆ, ಈಗಲೇ....".
"ಚಂದ್ರೂ ಅವರಿಗೆ ಹೇಳು ಕಂಪ್ಯೂಟರ್ ಹ್ಯಾಂಗಾಗಿದೆ ಅಂತ."
"ನಂಗೇನ್ ಗೊತ್ತು ಕಂಪ್ಯೂಟರ್ ಹ್ಯಾಗ್ ಆಗಿದೆ ಅಂತ. ತಮಾಶಿ ಮಾಡ್ತಾ ಇದ್ದೀರಾ...? ನಿಜವಾಗಿಯೂ ನನಗೆ ಗೊತ್ತಿಲ್ಲ." ಚಂದ್ರೂ
"ಅಲ್ಲ ಮರ್ರಯಾ ಅವ್ರಿಗೆ ಅರ್ಥ ಆಗತ್ತೆ ನಾನ್ ಹೇಳಿದ ಹಾಗೆ ಹೇಳು.ಹೋಗು"
ಅಂದರೆ ನನ್ನಈ ರಿಪೋರ್ಟಿನ ಸಾರಾಂಶದ ಮುಖ್ಯ ಪೇಜಿನಲ್ಲಿ ಮಾತ್ರ ಈ ಅಕ್ಷರಗಳನ್ನು ಅಂಕೆಗಳಾಗಿ ಸರಿ ಪಡಿಸಿಕೊಂಡು ನೋಡಬಹುದಾ..?
ಯಾಕೆಂದರೆ ಮೊತ್ತ ವೂ ಅದಕ್ಕನುಗುಣವಾಗಿ ಬದಲಾಗುತ್ತದಲ್ಲ....  ಮೊದಲೇ ಇದರ ಒಂದಾದರೂ ಪ್ರತಿ ತೆಗೆದಿರಿಸದಿದ್ದುದ್ದಕ್ಕೆ ನನ್ನನ್ನು ನಾನೇ ಶಪಿಸಿಕೊಂಡೆ. ಆದರೂ ಈಗ ಏನು ಮಾಡಲಾದೀತು...? ಚಂದ್ರೂ ಒಂದು ಸ್ಟ್ರೋಂಗ್ ಕಾಫಿ ....
ಮತ್ತೆ ನಮಗೆ...? ಕೋರಸ್!!!
ಕೂಲ್ ಕೂಲ್.....
ಚಂದ್ರೂ ಮೂರು.. ಕಾಫಿ
ಈಗಂತೂ ಹೈದ್ರಾಬಾದ್ ನಿಂದ ಬಂಡ್ರಿಯವರನ್ನು ಕರೆಸ ಬೇಕಾ, ಅಥವಾ ಪ್ರಸನ್ನ ಶಂಕರ ಪುರ ಅವರನ್ನೋ, ಅಥವಾ ರವಿಯವರನ್ನ, ಹೋಗಲಿ ಪ್ರಸಾದ್  ನನಗೇ ಬಂತು.
ಎಲ್ಲಿ ಕಳೆದಿದೆಯೋ ಅಲ್ಲೇ ಹುಡುಕಬೇಕಂತೆ. ಈ ಮಾತು ಯಾಕೆ ನೆನಪಿಗೆ ಬಂತು ಈಗ...??
ಅಲ್ಲ ಎಲ್ಲಾ ಡಿಲೀಟ್ ಮಾಡಿ ಪುನಃ ಶುರು ಹಚ್ಚಿ ಕೊಳ್ಳಲಾ.... ಇಲ್ಲ ಪುನಃ ಮಾಡಲು ಇದಕ್ಕೆ ಕಡಿಮೆ ಎಂದರೂ ಮೂರ್ನಾಲ್ಕು ದಿನ ಬೇಕೇ ಬೇಕು. ಸಾಧ್ಯವೇ ಇಲ್ಲ. ನನ್ನ ಅಷ್ಟು ದಿನದ ಶ್ರಮ ಈ ರೀತಿಯಲ್ಲಿ ... ಛೇ...
ಏನನ್ನಲಿ..? ಇವರಿಗೆ ...........ಇಲ್ಲ ನಿಜವಾಗಿಯೂ ಗೊತ್ತಿಲ್ಲ ಇವನಿಗೆ ತಾನೇನು ಮಾಡಿದ್ದೇನೆ ಅಂತ, ಪಾಪ.          ಆ ಸ್ಥಿತಿಯಲ್ಲೂ ನಗು ಬಂತು ಪಾಪ ಅವನಾ..ನಾನಾ ?
ಗೋಪೂ ಇದು ಬಿಡು ತ್ಯಾಂಪನನ್ನು ಎರಡು ಮೂರು ಶಾಲೆಯವರು ಕೈಮುಗಿದು ನೀವಿನ್ನು ಬರುವುದೇ ಬೇಡ ಇಲ್ಲಿಗೆ... ಅಂತ    ಕಳುಹಿಸಿದ್ದಾರೆ ಗೊತ್ತಾ...?
ಕೇಳಲೇ ಬೇಕು ..........ಕೇಳದಿದ್ದರೆ ಇವನು ಬಿಡುವುದೇ ಇಲ್ಲ...ಅದು ಸೀನನ ಶೈಲಿ
ಹೌದಾ ಏನಾಯ್ತು ಎಲ್ಲಾ ಅಷ್ಟು ಬೇಗ ಕಲಿತನಂತಾ... ಅಲ್ಲಲ್ಲ
ಏನು ಮಾಡುತ್ತಾನೋ ಗೊತ್ತಿಲ್ಲ ಇವನು ಕುಳಿತ ಸ್ವಲ್ಪ ಸಮಯದಲ್ಲೇ ಇವನ ಕಂಪ್ಯೂಟರ್ ಖಾಲಿಯಾಗಿ ಬಿಡುತ್ತದೆ...
ಅಂದರೆ ...?
ಅದರ ಪರದೆಯಲ್ಲೇ ಏನೂ ಇರಲ್ಲ..ಎಲ್ಲಾ ಖಾಲಿ....
ಪುಣ್ಯಾತ್ಮ ರಾಮ ಮೋಹನರು ಹೇಳಿದ ಹಾಗೆ "ಫಾರಮಾಟ್" ಮಾಡಲಾ  ಅಂದರೆ ಎಸ್ ಅಂತ ಬಟನ್ ಒತ್ತುತ್ತಾನೋ ಏನೋ..? ಇಡೀ ಕಂಫ್ಯೂಟರ್ ಫಾರ್ಮಾಟ್  ಎಸ್ ಅಂತ ಒತ್ತಿದ್ದಾಗ ನೋಡ ನೋಡುತ್ತಿದ್ದಂತೆಯೇ ಎಲ್ಲಾ ಫೈಲುಗಳೂ ಮಾಯವಾಗುತ್ತಾ ಇದ್ದು  ಕೊನೆಗೆ ಸಿಸ್ಟಮ್ಮೂ ಕೂಡಾ ಮಾಯವಾಗಿ  ....................................ಆ ಸ್ಥಿತಿಯಲ್ಲೂ ನಗು ಬಂತು. ನನ್ನ ಸ್ಥಿತಿಗಿಂತಲೂ ಅಧ್ವಾನ ಆ  ಸ್ಕೂಲ್ ನವರ  ಕಥೆ.
ಇವನು ಹೀಗೆ ಪ್ರತಿ ಕಂಪ್ಯೂಟರ್ ಅನ್ನೂ ದಿನಾ ಫಾರ್ಮಾಟ್   ಮಾಡುತ್ತಿದ್ದರೆ ಆ ಶಾಲೆಯವರೇನು ಮಾಡ ಬೇಕು ಪಾಪ, ಇವನನ್ನು ಹೊರಗಟ್ಟದೇ..
"ಕೊನೆಗೆ.......??"
ಈಗಿನ ಮಾಸ್ಟ್ರು ತುಂಬಾ ಒಳ್ಳೆಯವರು...
ಯಾಕೆ
ಅಲ್ಲ , ಹಾಗೆಲ್ಲಾ ಮಾಡಬೇಡಿ... ನಾನು ಬೇರೆ ಹೇಳಿಕೊಡುತ್ತೇನೆ ಎಂದರು.
ಅಲ್ಲಾ ಚಂದ್ರೂ ಎಲ್ಲಿ ಹಾಳಾಗಿ ಹೋದ... ಕಾಫಿ ಬರದೇ ನನ್ನ ತಲೆ ಓಡೋದೇ ಇಲ್ಲವಲ್ಲ.
ಮತ್ತೆ....
ಆಮೇಲೆ ಹೇಳಿದರು ಯಾವ ಫೈಲ್ ನೀವು ತಕೊಂಡರೂ ಅದನ್ನು ತೆರೆಯುವ ಮೊದಲು ಸೇವ್ ಆಸ್ ಅಂತ ಮಾಡಿ........
ನಾನೊಮ್ಮೆ ಜಿಗಿದೆ.....ನನಗೆ ನಂಬಿಕೆ ಬರುತ್ತಿಲ್ಲ............. ಏನೂ ಇನ್ನೊಮ್ಮೆ ಹೇಳೂ....
ಅದೇ "ಸೇವ್ ಆಸ್" ಮಾಡಿಕೊಂಡೇ ಮಾಡಿ ಅಂತ ಹೇಳಿದ್ದರು.
ಅಂದರೆ ನೀನು ತ್ಯಾಂಪ ಇದನ್ನು ಮುಟ್ಟುವ ಮೊದಲು ಹಾಗೆ ಮಾಡಿದ್ದೀರಾ...? ನನ್ನ ಸ್ವರದಲ್ಲಿ ನನಗೇ ನಂಬಿಕೆಯಿಲ್ಲ
ಹೌದು ಪ್ರತಿ ಸಾರಿಯೂ ಮಾಡ್ತೇನೆ ನಾನು.
ಎಲ್ಲಿದೆ ತೋರ್ಸು............ ಬೇಡ.......  ಮೇಲೆ ಫೈಲ್ ಹೆಸರು ನೋಡಿದೆ ಅದರಲ್ಲಿ  ಕೊನೆಯಲ್ಲಿ ಒಂದು ಅಂತ ಸೇರಿಸಿದ್ದ .........ಅಂದರೆ ನನ್ನ ಅಸಲೀ ಫೈಲ್ ಕಂಪ್ಯೂಟರ್ನಲ್ಲೇ ಇದೆ ಸೇಫಾಗಿ...
 ಫೈಲ್ ಓಪನ್ ಮಾಡಿದೆ ನಿಜ ನನ್ನ ಅಸಲೀ ಫೈಲ್ ಇಲ್ಲೇ ಇದೆ........... ನನಗೆ ನಂಬಿಕೆಯೇ ಬರುತ್ತಿಲ್ಲ
ಜೀವದಲ್ಲಿ ಜೀವ ಬಂತು ಆಗಲೇ ಚಂದ್ರೂ.... ..........ಮೂರು ಕಾಫಿ ಎಂದ ರಾಗವಾಗಿ.......
"ಅಲ್ಲ ಗೋಪು, ನಾನು ಇನ್ನೊಂದು ಕಲಿತಿದ್ದೇನೆ   ಗೊತ್ತಾ....? ಈ  ಶಿಫ್ಟ್ ಮತ್ತು ಮತ್ತು ಡಿಲೀಟ್ ಒಟ್ಟಿಗೇ ಒತ್ತಿದರೆ ಯಾವುದೇ ಫೈಲ್ ಕೂಡಾ ಕಸದ ಬುಟ್ಟಿ ( ರಿ ಸೈಕಲ್ ಬಿನ್ ) ಗೆ ಸಹಾ ಹೋಗದೇ ಮಾಯವಾಗಿಬಿಡುತ್ತೆ,  ಗೊತ್ತಾ ನಿನಗೆ ಇದು, ತೋರಿಸಲಾ.......?"  ತ್ಯಾಂಪ........
 " ಬ್ಯಾಡ............ ಬ್ಯಾಡ.......... ಏಯ್...."
ನಾನು ಕಾಫಿ ಕಪ್ ಎಸೆದು ಕಂಪ್ಯೂಟರ್ ಬಳಿ ಓಡಿದೆ......









No comments:

Post a Comment